Sportowcy jěchanskeho towarstwa „Při Klóšterskej wodźe“ Pančicy-Kukow přihotuja so tuchwilu na nowu sezonu pod hołym njebjom. W braniborskim Löwenbergu je so za přezpólnych jěcharjow lětuša zelena sezona z turněrom zahajiła. Sportowcy ze zapřahami startuja potom kónc apryla w braniborskim Klein-Marzehns. Halena Jancyna je so z čłonom předsydstwa a zdobom aktiwnym přezpólnym jěcharjom Křesćanom Zahrodnikom rozmołwjała.
Po lětušej hłownej a wólbnej zhromadźiznje njeje so w předsydstwje ničo změniło. Je potajkim wšo při starym?
Kř. Zahrodnik: Tuchwilu ma towarstwo 46 čłonow, telko kaž hišće ženje. Najmłódši čłon je tři lěta stary, najstarši je 65. A to najrjeńše, wšitkich zwjazuje lubosć ke konjacemu sportej. Wosebje zwjeselace je womłodźenje towarstwa. Wjace hač połojca wšěch čłonow su dźěći a młodostni.
Spočatk apryla su někotři z was hižo w Braniborskej na turněrje pobyli – kak je so sezona zahajiła?