Pisana kultura symbolizuje přećelstwo ludow

pjatk, 28. apryla 2017
artikl hódnoćić
(0 )
Wustup wukrajneje kulturneje skupiny na XI. mjezynarodnym festiwalu Łužica w Chrósćicach  Foto: SN/Maćij Bulank Wustup wukrajneje kulturneje skupiny na XI. mjezynarodnym festiwalu Łužica w Chrósćicach Foto: SN/Maćij Bulank

XII. mjezynarodny folklorny festiwal hižo kiwa

Folklorny festiwal „Łužica“ je někotre změny dožiwił, etablěrujo so dale jako kruty kulturny wjeršk w Hornjej Łužicy. Prěni tajki 1995 běše pospyt a zdobom dźak rejowanskeju skupin ze Smjerdźaceje a Wudworja. Wobě běštej hižo časćišo na festiwalach přebywałoj a chcyštej skónčnje tež raz kulturne ćělesa do Łužicy přeprosyć. Prěnje přeprošenje sćěhowaše wosom skupin z wukraja, kotrež tule­ zhromadnje tři festiwalne dny wuhotowachu. Z ideje nasta swjedźeń z nadregionalnym charakterom a je mjeztym w syći mjezynarodnych CIOFF® festiwalow zakótwjeny.

XII. mjezynarodny festiwal „Łužica 2017“ je znowa tróšku wobšěrniši hač před lětomaj. Hižo štwórtk, 22. junija, dopołdnja započnje so wón z předstajenjom za šulerjow, kotřiž wuhladaja na jewišću Budyskeho dźiwadła jako prěni tři hóstne skupiny z wukraja. W běhu dnja přijědu potom­ dalše cyłki, kotrež so popołdnju w Serbskim domje prezentuja. Přizamknje so ćah festiwalnych skupin přez Žitne wiki na Hłowne torhošćo, hdźež budźe zhromadne kołoteptanje z publikumom – rjany to symbol. Přiwšěm njeběchu trawersy­ Dźiwadła na hrodźe na wote­wrjenskim programje hišće ženje tak prawje pjelnjene. Najskerje je Budyšin ze 40 000 wobydlerjemi hišće přemały.

Pjatk zeznajomja so wukrajni hosćo z Łužicu. Dopołdnja podadźa so do Delnjeje Łužicy, wuhladaja po puću wuhlowe jamy a dožiwja w Błótach muzej a čołmikowanje. Z Hochožanami namakachu organizatorojo festiwala lěta 2007 partnera. Tak budźe lětsa swjedźeń šesty raz tež w delnjołužiskej Hochozy. Pjatk wječor přewjedu tam mjenujcy podobnje Chrósćicam pisany swjedźeń na wjacorych burskich statokach a při cyrkwi, a to ze samsnym angažementom gmejny, towarstwow a firmow.

Sobotny program je so spočatnje po wječornych kemšach w Chrósćicach na štyrjoch statokach zahajił. W běhu lět su hižo po wobjedźe a na někotrych dworach dalše programowe poskitki k tomu přišli: wiki tradicionalneho rjemjesła najprjedy njedźelu, bórze tež sobotu, zabawa za dźěći, prezentacija SLA a program dorosta „W kraju wjesołych dźěći“. Kolokwij ke kulturno-folklorno-politiskim temam je wot II. festiwala z wobstatkom programa. Lětsa „kombinujemy“ kolokwij druhi raz ze seminarom słowjanskich čłonow FUEN.

Programowy dypk Chrósćicy sobotu wječor – a analognje tón pjatk w Ho­chozy – drje so najhusćišo mjenuje, prašeš-li so za wosebitosću łužiskeho swjat­ka.­ A rozhladujo so po CIOFF®-protyce festiwalow na swěće namakaš lědma jedyn, hdźež pokazuja programy w kulisy statokow z kulinariskimi specialitami. Na dotal jědnaće festiwalach běchu w Chrósćicach dohromady 103 skupiny z 25 krajow swěta – z toho 52, kotrež reprezentowachu pak narodnu mjeńšinu pak awtochtony lud. Tónkróć připrajichu ansamble z Egyptowskeje, USA, Grjekskeje, Chorwatskeje, Kolum­biskeje, Rumunskeje, Madźarskeje, Słowakskeje, Běłoruskeje, Pólskeje a Italskeje.

Wot lěta 2007 poskićeja so festiwalnu sobotu wot 23 hodź. „Chrósćicy special“. Štož je tež prezen­tacija folklory – hłownje hudźbneje, po modernym z instrumentarijom pophudźby.

Njedźela je so přeco hižo započała z Božej mšu – najčasćišo na swjedźenskej łuce při pomniku – z mjezynarodnymi hosćimi, kotřiž ju tež wobrubjeja. Swjedźenski ćah něhdźe 600 wobdźělnikow přiwabja kóždy raz tysacy přihladowarjow.

Popołdniši program łužiskich kulturnych cyłkow je wosebitostka. Hdy hewak dožiwjamy zhromadny wustup našich rejwanskich skupin? W běhu lět je so jenož­ dwójce poradźiło, tónle ekstra produkowany­ program pozdźišo hišće raz wospjetować. Finale je pisany wjeršk a wukónc festiwala, skedźbnjacy hišće raz na mnohostronskosć mjezynarodneho swjedźenja.

Wšitcy wobdźělnicy nadźijeja so zaso bohateho přihladowarstwa a njezapomnitych dnjow w Serbach.

Marko Kowar/Beno Šołta

wozjewjene w: Kultura & wuměłstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND