ST 1922 Radwor
– Motor Kumwałd 1:2 (1:1)
Zestawa domjacych: Kral – Zähr, Bejmak, Šěrak, Henke (78. Bauer), Rachela (59. Omran), Zimmermann, Nuk, Wjeńka, Schulze, Kurjat (71. Glücklich)
Radworscy koparjo wočakowachu sobotu mustwo z Kumwałda. Hra prěnjeje połserije bě w poslednjej mjeńšinje na dobro Motora wušła, jako Patrick Reise k 2:1 (90.) trjechi. Radworčenjo chcychu nětko doma dobyć a nimo toho słaby wukon minjeneho tydźenja polěpšić. Tuž sej tónraz tójšto předewzachu.
Kumwałd měješe hižo po 11 mjeńšinach trójnu šansu na nawjedowanje. Beno Kral w Radworskich wrotach pak pokaza swoju kwalitu. W 15. min. mějachu domjacy prěnju dobru akciju. Johannes Zähr posłuži z diagonalnej přihrawku na prawym boku Mateja Wjeńku, kiž bul dosrjedźa přinjese. Tam čakaše Tom Schulze a trjechi k 1:0. Po róžku Měrćina Kurjata zhłójčkowa Daniel Nuk kulowatu kožu nimo wrotow. W 33. min. pak klinkaše naraz w klětce Krala. Raul Rachela zhubi bul w srjedźnym polu a Stephan Rumler sadźi sylnu třělwu z 20 metrow do wrotow. Hišće do połčasa mějachu Kumwałdźenjo wjacore móžnosće na nawjedowanje, tola wšitke pospyty zwrěšćichu při Radworskim wrotarju.