Z nowym rekordnym wobdźělenjom je so 225 šulerjow a wučerjow Serbskeho gymnazija Budyšin (SGB) na jubilejnym 15. Budyskim běhu z wutrobu wobdźěliło a sej tak nimale 2 800 eurow naběhało.
Při rjanym słónčnym wjedrje wotmě so njedawno na Młynkec łuce 15. Budyski běh z wutrobu we hłownej organizaciji Ludoweje banki Drježdźany-Budyšin. A wobdźělnicy nastajichu wjacore rekordy. Sprěnja překročichu šulerjo a wučerjo Budyskich gymnazijow kaž tež Wjelećanskeho a Biskopičanskeho gymnazija a Powołanskošulskeho centruma za hospodarstwo a techniku magisku hranicu 2 000 sportowcow na ličbu 2 428. Zdruha zmištrowachu woni wulkotne 16 099 kołow, kóžde něhdźe 600 metrow dołhe. Jednotliwy team wobsteješe z třoch běharjow, kotřiž so wotměnjejo jednu hodźinu za dobry zaměr angažowachu.