Torsten Herbst w rozmołwje wo mjeńšinowej a migraciskej politice

Budyšin (SN/mb). Připołdnju dwě hodźinje w sněze na dróze w Budyšinje stać, nawječor zarjadowanje w Tharandće wotměć a mjez terminomaj na rozmołwu w Serbskich Nowinach chwatać – tak wupadaše wčera dźeń načolneho kandidata sakskeje FDP za wólby zwjazkoweho sejma, Torstena Herbsta. Serbam je překwapjenku sobu přinjesł, čerstwje do hornjoserbšćiny přełoženy wólbny program swojeje strony pod hesłom „Wšo hodźi so změnić“. Wuraz to připóznaća serbskeho ludu, za kotrehož prawa je so Herbst, parlamentariski jednaćel frakcije FDP, w nachilacej so wólbnej periodźe wuspěšnje zasadźował: z reformu zakonja wo mjenowym prawje, štož Serbowkam zmóžnja, swoje serbske mjeno do wupokaza zapisać dać.