Prof. dr. Georg Milbradt swoje mysle k nowozadołženju knježerstwa podał

Połčnicy (SN/BŠe). Nowozadołženje – poćeženje abo šansa za přichodnu generaciju? – bě hesło zarjadowanja Budyskeho wokrjesneho zwjazka CDU wčera w Połčnicy. Za to su sej wěcywustojneho hosća přeprosyli. Bywši sakski ministerski prezident a financny minister prof. dr. Georg Milbradt – mjeztym 80lětny – je swoje mysle k nowozadołženju zwjazkoweho knježerstwa podał. Spočatnje skedźbni předsyda zwjazka CDU w Budyskim wokrjesu Steffen Roschek na to, zo knježi mjez wobydlerjemi a čłonami strony wulka njewěstosć. „Poprawom steješe konserwatiwna CDU stajnje za to, mjezu zadołženja dodźeržeć“, Roschek wuzběhny. Ćim wažnišo nětko je, přičiny nowozadołženja rozjimać.

Čłon předsydstwa CDU wokrjesa Reiner Rogowski předstaji prof. dr. Georga Milbradta jako fachowca za financu politiku, kiž je konsekwentnje lutował a mjezu zadołženja dodźeržał. Swobodny stat je dołho z toho profitował.