„To bě zjednanliwe wotzamknjenje hrajneje doby.“, rjekny trenar prěnjeho koparskeho mustwa DJK Módro-běłych Kulow Stephan Prucha po poslednjej hrě sezony 2024/2025. Tu běchu Kulowčenjo doma před 60 přihladowarjemi mjenujcy 5:2 přećiwo KT Ottendorf-Okrilla dobyli. Z tym polěpšichu so Kulowčenjo w tabulce wokrjesneje wyšeje ligi hišće wo jedne městno na wosme. Hakle na sydomnatym hrajnym dnju běchu so trochu z pincy tabulki wuswobodźili. Prěnje a druhe koło běštej za Kulowčanow nimale jenak wuspěšnej.

Hinak je to w statistice domjacych a wonkownych hrow. Doma w Kulowje cyłk Stephana Pruchi lěpje hraješe hač w cuzbje. Na kóncu zhladuja cyłkownje na 11 dobyćow, 6 remisow a 13 poražkow. Wrotowy poměr 46:54 bě wosom minusowych wrotow dla negatiwny.