Jedna testowa koparska hra, wjacore dypkowe koparske partije, dwaj wolejbulowej duelej doma a jedna nachwatanska wolejbulowa dypkowa hra – takle­ hodźa so sportowe wjerški za kompaktnu wersiju w telegramowym stilu zjimać.

Koparjo sportoweje jednotki Njebjelčicy su prěni a zdobom posledni test do druheje połserije w Halštrowje přećiwo hrajnemu zjednoćenstwu Halštrow/Hlinowc 3:5 přěhrali. Za Njebjelčanow trjechichu Ronny Hanuza (15.), William Plaettner (42.) a Stefan Bjeńš (90.).

Wot wyšeje ligi hač dele do wokrjesnych ligow pak su mustwa wo dypki hrali. Jednota Wernigerode a Budissa Budyšin běštej so we wyšej lize 3:3 rozešłoj. Za Budyšanow trjechichu Karl-Ludwig Zech (10.), Jannik Käppler (73.) a Felix Henning (88.). Biskopičenjo podležachu doma VFB Auerbachej 0:2.

Wosebitu hru w sakskej klasy je 170 přihladowarjow w Němskich Pazlicach dožiwiło. Hosćićeljo dobychu duel přećiwo hosćom z Drježdźan-Strěžina 3:2. Cyłkownje bě sudnik jědnaće žołtych kartkow pokazał, sydom z nich Němskopazličanam.