Pohladaće wy, lubi čitarjo, tež hdys a hdys do słownika? Njeměnju naš woblubowany Soblexx, hačrunjež tam tež nimale wšědnje pohladnu, hdyž za někajkim słowom pytam. Ně, měnju prawy słownik z krutej wobalku z papjerca a wjele stronami. Mam jich doma wjacore a sym cyle hordy na to, zo su mjez nimi někotre trochu starše originale, kotrež su mjeztym žadnostka, kaž Jurja Kralowy serbsko-němski słownik z lěta 1927 a runje tajki wot Filipa Jakubaša z lěta 1954. Wosebje pak česću sej němsko-serbski słownik dr. Filipa Rězaka z lěta 1920. Z něhdźe 90 000 hesłami je wón historiski měznik hornjoserbskeje leksikografije. Druhdy w nim něšto namakaš, štož w Soblexxu njenamakaš. A z tym njeměnju jenož serbske přełožki němskich słowow.