SJ Chrósćicy 1981 – ST Póst Germania Budyšin 5:1 (3:0)
Zestawa SJ 1981 Chrósćicy: Škoda – Mark, Cyž, Kral-Zahrodnik, Dźisławk, G. Zahrodnik, Žur (92. Donat), Zelnak (82. M. Zahrodnik), Graf (73. Bjeńš), Šiman, Bogusz (84. Kola)
Kermušnu njedźelu wočakowaše Chróšćanske prěnje mustwo doma hosći z Budyšina. Do hry bě jasne, zo njebudźe tole jednory duel, wšako přećiwnik w tabulce hnydom za Chróšćanami steješe. Přiwšěm spytachu hrajerjo trenarja Waldemara Adamowicza a kotrenarja Feliksa Cyža prěnje městno, kotrež běchu sej ze seriju dobyćow wubědźili, zakitować.
Wjace hač 200 přihladowarjow widźeše dosć wurunany start do hry. Wobě mustwje so hižo zahe wrotam přećiwnika bližeštej. Jednu z najlěpšich móžnosćow mějachu hosćo. Ofensiwny hrajer pruwowaše z hłójčkowanjom wrotarja Jakuba Škodu, kotremuž pak so poradźi bul na žerdź wotblokować. Kaž hižo w zašłych hrach wón z paradu tomu zadźěwa, zo přećiwnik zetkanku nawjeduje. Škoda měješe tohorunja stabilnu defensiwu před sobu, kotraž hru solidnje wotzady natwarješe. To běše tež tutón króć wažny dźel strategije SJC.
