Herbstwo zachować
Bohužel je so w zašłosći wjele starych rjemjesłow abo nastrojow zhubiło. Tak je so něštožkuli wotstroniło a z nowym narunało, kotrež aktualnemu stawej techniki wotpowěduje. Ćim wažniše su dźěłarnički kaž je Błótowske towarstwo organizuje. Zaměr tuteje je stare rjemjesło – twar drjewjanych čołmow – zachować. To je přikładne! W tajkich projektach wotbłyšćuje so rjemjeslniska wušiknosć, z kotrejž su naši dźědojo a nanojo swoje dźěło wukonjeli. Zdobom pokazuja tam, kak su prjedownicy graty, mašiny abo nastroje wužiwali. To su naposledk wopisma zašłosće, kotrež stawizny powědaja. Tajke dyrbimy sej zachować. Nimo toho swědča drjewjane čołmy w Błótach wo zašłym žiwjenju na groblach. Tradicionalne rjemjesła a kmanosće su wažny dźěl našeho kulturneho herbstwa. Wone su so wot generacije k generaciji dale dawali a reprezentuja stawizny kaž tež identitu wobydlerjow kónčiny.
Bianka Šeferowa
Inwestor René Benko zajaty
Wien (dpa/SN). Bywšeho imobilijoweho inwestora Renéja Benka su po informacijach statneho rěčnistwa we Wienje zajeli. Přičina je strach dalšich njeskutkow kaž tež móžne haćenje přepytowanjow.
Za hospodarsku a korupcisku kriminalitu zamołwite statne rěčnistwo wumjetuje 47lětnemu, zo je w zwisku z insolwencu swojeho z wjacorych firmow wobstejaceho imperija swójske zamóženje zatajił. Nimo toho je sej w załožbje składowane zamóženje ilegalnje přiswojił, tak zo njebychu zarjadnišća, zarjadowarjo a wěrićeljo pjenjezy wužiwać móhli.
Awstriski předewzaćel bě ze swojej firmowej skupinu Sigma hoberski koncern natwarił, do kotrehož słušachu tež němske kupnicy KaDeWe a Galeria. Tute namakamy mjez druhim tež w Choćebuzu. Dla stupacych danjow kaž tež přiběracych twarskich kóštow a energijowych płaćiznow je so jeho imperij sypnył. Po informacijach rjadowarja insolwency je suma njezapłaćenych zličbowankow 2,4 miliardy eurow wysoka. W Němskej mjeztym wjacore twarnišća wotpočuja, mjez nimi wulce prestižny, hoberski a spektakularny Elb-Tower w Hamburgu.
132. zapust w Bórkowach swjećili
To a tamne (23.01.25)
W policajskim awće do šule přijěł je wosom lět stary hólc w Drježdźanach. Pachoł sedźeše płakajo při zastanišću tramwajki, dokelž bě předaloko jěł, policija zdźěli. Swědk bě zastojnikow informował a wo to prosył, zo bychu so wo hólca starali. Zastojnicy zazwonichu mać a so prašachu, do kotreje šule jeje syn chodźi. Po tym dowjezechu pachoła w policajskim awće na wučbu.
W kašćiku, kotryž móžeš zamknyć, je 27lětny na Erfurtskim hłownym dwórnišću přenocował. Policajskej patruli napadnychu po swójskich informacijach črije, kotrež z faška sahachu. Spočatnje tukachu zastojnicy na złóstnistwo, doniž muža njewuhladachu. Policisća jeho wubudźichu a prošachu, sej druhe městno za spanje pytać, na přikład w dwórnišćowej misiji. Zo njeje muž štyri eura za fašk zapłaćił, jemu zastojnicy wodachu.
Prof. dr. hab. Tadeusz Lewaszkiewicz woswjeći 75. narodniny
Lětsa woswjeći ze Serbami wusko zwjazany pólski rěčespytnik prof. dr. hab. Tadeusz Lewaszkiewicz swoje 75. narodniny. Wón narodźi so 22. januara 1950 w Słońsku blisko města Sulęcin, hdźež wopyta licej (gymnazij). 1967 poda so do Poznanja, hdźež studowaše hač do 1972 pólsku filologiju. Kónc studija počeše so šěršo slawistisce wěnować, chodźeše na čitanja serbišćiny/chorwatšćiny, čěšćiny a bołharšćiny. Po tym kubłaše so na polu indoeuropeistiki dale. 1975 a 1976 wuwučowaše w Halle pólšćinu a wopytowaše wučbu serbšćiny pola prof. Hinca Šewca w bliskim Lipsku. 1976 zdoby sej z dźěłom „Slawistiska problematika w słowniku Lindeho“ doktorski titul. Přesydli so do Lipska, hdźež móžeše studij serbšćiny pohłubšić. Wot 1982 skutkowaše na 20 lět w slawistiskim instituće Pólskeje akademije wědomosćow. W lěće 1986 zhabilitowa so ze sorabistiskej temu na Waršawskej uniwersiće, zaběraše so z hornjoserbskimi městnostnymi mjenami. Dźěło wuńdźe 1988 we Wrocławju. 1994/1995 zastupowaše slawistisku profesuru w Drježdźanach a skutkowaše 1997/1998 jako wizitowacy profesor slawistiskeho instituta uniwersity w Greifswaldźe.
Końcaŕ předsyda serbskeje rady
Podstupim (SN/BŠe). Čłonojo Braniborskeje serbskeje rady su so wčera w rumnosćach Podstupimskeho krajneho sejma na swoje konstituowace posedźenje zešli. Jedyn z prěnich dypkow dnjoweho porjada běchu wólby předsydy. Jednohłósnje wuzwoli rada jednaćela Domowiny za Delnju Łužicu Marcusa Końcaŕa. Diplomowa designerka za tekstilije Delia Münchowa, je nowa městopředsydka. Wona wostanje zdobom čłonka wuběrka za dźěći a młodostnych w Braniborskej. Po tym sćěhowachu dalše wólby čłonow rady do wuběrkow krajneho sejma.
Skónčnje wuhódnoćeše nawodnica wólbneho wuběrka Margit Neugebauer hišće raz wólby. Wona wjeseli so nad sylnym wobdźělenjom. „Serbske medije su wólby derje přewodźeli. Ze stron němskich tomu tak njebě“, wona zwurazni. Wolili su ludźo w starobje mjez 16 do 96 lět. Zwjeselace je, zo su wjele młodych wobydlerjow hłosowali. Nimo toho skedźbni Margit Neugebauer na komplikowany wólbny porjad, kotryž bě za wuběrk wužadanje. Wona přeje sej předźěłanje, čemuž chce so nowa serbska rada mjez druhim wěnować.
Zasudźenych z jastwa pušćili
Washington (dpa/SN). Krótko po tym zo bě nowy prezident Donald Trump wšitkich skućićelow nadběha na Kapitol wobhnadźił, su prěnich zasudźenych z jastwa pušćili. Po informacijach medijow su tež wobskorženi zaso swobodni, kotrychž běchu k wjelelětnej jatbje zasudźili. Mjez nimi je tež załožer prawicarskeje radikalneje skupiny „Oath Keepers“, Steward Rhodes. Jeho bě sudnistwo mjez druhim „zběžkarskeho zapřisahanja“ dla k 18 lětam jastwa zasudźiło.
Trump za dalše sankcije
Washington (dpa/SN). Prezident USA Donald Trump dalše sankcije přećiwo Ruskej njewuzamkuje. Na prašenje hač by wón tajke naprawy wukazał, njeby-li prezident Wladimir Putin k jednanjam wo skónčenju wójny w Ukrainje zwólniwybył, Trump rjekny: „To mam za móžne.“ Republikan zwurazni zdobom swoju zwólniwosć so z Putinom a ukrainskim prezidentom Wolodymyrom Zelenskym rozmołwjeć. „Hdyžkuli tole chcedźa, budu so z nimi zetkać“, Trump přilubi.
Rekordne wudawki za brónje
