Widźał,słyšał, napisał (29.05.17)

póndźela, 29. meje 2017
artikl hódnoćić
(0 )
Awtor dźensa Jurij Bjeńš

Wčera wotmě so we Wittenbergu wulka swjedźenska Boža słužba. Wjac hač sto tysac ludźi spominaše tam na spočatk reformacije před 500 lětami. Snano bě mjez nimi tež tón abo tamny Serb, štož wostanje spekulacija. Zo pak poby wot srjedy hač do pjatka tón abo tamny Wittenbergčan w serbskej Łužicy, njeje spekulacija, ale sćěh wjele­lětneho přećelstwa. 13 młodostnych z lutheroweho města tu přebywaše, a to, zo bychu kopańcu hrali – přećiwo serbskej wubrance II. Za čas studija w Lipsku nasta mjez někotrymi młodostnymi z Wittenberga a črjódku nas serbskich studentow mjenujcy krute přećelstwo, kotrež je naje­bać zdalenosć něhdźe 150 kilometrow dale žiwe. Dotal wopytowachmy so mjez druhim stajnje na narodninach abo běchmy zhromadnje na festiwalach. Chwile za wulke swjedźenje a festiwale pak je staroby dla lěto a mjenje, a z teje přičiny dyrbimy za prawidłowne zetkanja hinaše zarjadowanja namakać. Sportowe podawki, wosebje kopańca, su za to prima składnosć.

wozjewjene w: Sport
Prošu přizjewće so, chceće-li komentar podać

Serbska debata

nowostki LND