ST 1922 Radwor – SZ Großnaundorf 4:1 (4:1)
Zestawa domjacych: Kral – Henka, Šěrak, Omran, von Karwin, Hančik, Bejmak, Nuk, Zimmermann, Kurjat (78. Mark), Schulze (90. Bauer)
Po njetrjebawšej poražce tydźeń do toho w Ramnowje, hdźež klacaše na klewernosći, su sej koparjo ST 1922 Radworja za domjacu hru předewzali dobyć. To bě tež wot spočatka spóznajomne. W duelu nowačkow we wokrjesnej wyšej lize mějachu woni wot prěnjeje minuty ceptar w rukomaj. Nimale wšitke strašne hrajne sceny wotměwachu so před wrotami hosći. Nawal Radworskich nadběhow pak bě najprjedy bjez wuspěcha. Hakle po njelepym wotwobaranskim pospyće hóstneho wrotarja so suk torhny. Spěšnje Daniel Nuk reagowaše a z něhdźe dwaceći metrow bul z centralneje pozicije do saka sadźi (7.).