Posudźować wužaduje

štwórtk, 19. apryla 2018
artikl hódnoćić
(0 )
W jury skutkowachu mjez druhim jako předsydka, fachowa poradźowarka za serbšćinu a wučerka na Radworskej wyšej šuli Milenka Ertelowa (2. wotlěwa), wučerka na Budyskim Serbskim gymnaziju Marka Pěčcyna, referendar na Budyskej Serbskej wyšej šuli Michał Wowčer a wučer na Slepjanskej wyšej šuli Ludwig  Eckert (wotlěwa). Foto: Milenka Rječcyna W jury skutkowachu mjez druhim jako předsydka, fachowa poradźowarka za serbšćinu a wučerka na Radworskej wyšej šuli Milenka Ertelowa (2. wotlěwa), wučerka na Budyskim Serbskim gymnaziju Marka Pěčcyna, referendar na Budyskej Serbskej wyšej šuli Michał Wowčer a wučer na Slepjanskej wyšej šuli Ludwig Eckert (wotlěwa). Foto: Milenka Rječcyna

Mjez pruwowarjemi na lětušej 52. olympiadźe serbšćiny bě Michał Wowčer. Milenka Rječcyna je so z referendarom za serbšćinu a biologiju, ­kiž skutkuje na Budyskej Serbskej ­wyšej šuli, rozmołwjała.

Sće prěni króć na olympiadźe serbšćiny w jury sedźał?

M. Wowčer: Haj, tomu tak je. Sym wšak scyła prěni króć na tymle wurisanju wobdźěleny. Za swój studentski čas běchu městna na olympiadźe mjez studentami jara požadane. Njemějach tehdy zbožo so wobdźělić směć. Tež jako šuler njejsym na wubědźowanju był, wšako njejsym chodźił na Budyski Serbski gymnazij.

Štó je Was narěčał, lětsa jako juror na zarjadowanju we Wodowych Hendrichecach sobu dźěłać?

M. Wowčer: To su byli moji kolegojo z Budyskeje Serbskeje wyšeje šule, wo­sebje mojej kolegaj Kerstin Klingnerowa a Jan Hrjehor, kiž wšak je runja mi na olympiadźe był.

Što je Was wabiło so wobdźělić?

M. Wowčer: Sym skónčnje chcył ze­znać wašnje wubědźowanja, wšako to dotal dožiwił njejsym. Mje je zajimowało, kotre wukony šulerjo ze wšelakich rěčnych skupin pokazuja.

Po kotrym modusu sće šulerjow Budyskeje Serbskeje wyšeje šule za lětušu olympiadu wuzwolił? Wšako tam sam serbšćinu wuwučujeće.

M. Wowčer: Na našej šuli mamy jenož zrědka maćernorěčnych šulerjow. Tuchwilu nimamy w 6. lětniku maćeršći­narjow. Smy tuž našich najlěpšich šu­lerjow, dweju z rěčneje skupiny 2, to rěka z kruha 2plus-šulerjow, a třoch z rěčneje skupiny 3, to rěka tych, kotřiž wuknu serbšćinu jako cuzu rěč, na olympiadu słali. Woni maja wysoku motiwa­ciju a to pytnjemy tež wšědny dźeń w šuli. Woni dźěłaja hinak hač druzy šulerjo a tuž su so tež na tutym wubědźowanju ze sylnym wukonom wobdźělili.

Je było tele wurisanje za Was jako referendar tež fachowe wužadanje?

M. Wowčer: Moje wosobinske wužadanje bě, wukony šulerjow hódnoćić. W tym nimam hišće wjele praksy. Wobdźělnicy maja so po jich rěčnej kwaliće posudźić. Tam mam hišće nazhonjenja zběrać. Tuž bě to na kóncu woprawdźite wužadanje za mnje.

Sće na olympiadźe dźěłał hromadźe z młodymi kaž tež z dosć nazhonitymi wučerjemi. Što je Wam při tym wosebje napadnyło?

M. Wowčer: Najwažniše dopóznaće je, zo móžeš sej wot staršich wučerjow ­tójšto wothladać, wosebje, kak a pod kotrymi měritkami woni wukony šulerjow hódnoća. Wšako ma to wšitko sprawne być. Nastupajo přihot na olympiadu sym dóstał w předpolu wšitke podłožki. Potom mějach so samostatnje přihotować.

Budźeće klětu wospjet pódla?

M. Wowčer: Jeli-zo směm, potom jara rady.

Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND