Tradicionalnej wolejbulowej dwubojej na Serbskim gymnaziju Budyšin (SGB) wotměštej so minjeny štwórtk. 29. duel muskeje generacije rozsudźichu maturanća z 3:0 přećiwo swojim wučerjam, rozžohnowace so abiturientki přewinychu wučerki z 2:0.
Tradicionalnej duelej při wysokim saku stej minjeny štwórtk krótko do 14 hodź. mnohich šulerjow wjacorych lětnikow přiwabiłoj, a to do sportownje Serbskeho a šulskeho zetkawanskeho centruma Budyšin. Wulki fanowy blok našich dwanatkarjow postara so wo porjadnu atmosferu a tworješe tak perfektny ramik wubědźowanja. Za musku generaciju SGB bě to mjeztym 29. wolejbulowy duel. 26. meje 1993 běchu so abiturienća přećiwo swojim wučerjam z 3:2 přesadźili. Tež tónraz juskachu woni nad jasnym 3:0, dobywši jednotliwe přechody 25:21, 25:19 a 25:18. W mustwje tči njesměrny potencial, kotryž je wone tón dźeń přeswědčiwje wužiwało. We wurisanjach „Młodźina trenuje za olympiju“ je tónle lětnik 2019 z kapitanom Jakubom Bobku mjez šěsć finalistami 4. městno wobsadźił a lěto pozdźišo so z bronzu do Łužicy wróćił (SN rozprawjachu).