Poslednje zbožo falowało
Łužiske lodohokejowe liški –
Lawy Frankfurt 2:3 (0:1, 0:1, 2:1)
Na 18. hrajnym dnju druheje najwyšeje lodohokejoweje ligi Němskeje (DEL 2) podležachu Łužiske lodohokejowe liški prěnjemu DEL 2 snadnje z 2:3. Hižo po 18 sekundach steješe Ryon Moser swobodny před wrotarjom domjacych Tobiasom Ančičku. Po 45 sekundach pospyta so Clarke Breitkreuz před Bastianom Kucisom. Wobaj poslednjej mužej pak swoje wrota zakitowaštaj. Slědowaše faza, w kotrejž stej wobě mustwje wjele ćišća wukonjałoj, ale wuspěch žadyn njewuskoči. Prěnje wrota padnychu po konteru. Darren Mieszkowski z centralneje pozicije wotzamkny. Třělwa bu dwójce wotfalšowana, a puk dźěše mjez nohomaj Ančički k 0:1 (10.) do syće. Liški drje so dale a lěpje do hry namakachu a sej wjace dobrych šansow wuhrachu, ale poslednje zbožo před wrotami jim falowaše.