Spočatk sezony mějachu zamołwići Sokoła Ralbicy/Hórki ideju, so wo wuhotowanje wokrjesneho pokalneho finala požadać. Jako připrajenje dóstachu, so wězo wšitcy nadźijachu, zo budźe to domjace finale. Sokoljo běchu so w minjenych lětach husto jako sylny pokalny cyłk wopokazali. W zašłych 15 lětach stejachu štyri króć w finalu, trójce trofeju tež dobychu. Hač so jim njedźelu tohorunja poradźi? Prjed hač tak daloko budźe, steji wot pjatka pjeć dalšich hrow na programje.

Horcoty dla su so poprawne finalne časy trochu změnili.

Stara garda zahaji koparski kónc tydźenja pjatk, 26. junija, wječor. Tež wona hraje na wulkim polu, zakop budźe we 18.30 hodź. Za finale kwalifikowaštej so Wojerowski FC a LSV Hory. Přećiwo naposledk mjenowanemu cyłkej z Horow bě stara garda Sokoła Ralbicy w štwórćfinalu 0:1 podležała.