LSV Hory 1990
– Sokoł Ralbicy/Hórki 1:0 (1:0)
Zestawa hosći: Gloxyn – F. Bejma, Schultz, B. Bjeńš, Lulak, S. Bjeńš, Šołta, Wałda (71. Kurjat), Bejmak, Domaška, B. Bejma
Njedźelu dopołdnja liješe so tež na Horach kaž z kanow. Tak a tak hižo hlinite hrajnišćo bu z tym jara hładke a błóćane. W prěnim połčasu mějachu koparjo swoju lubu nuzu, sej bul porjadnje přihrawać a so wo natwar postarać. Hosćićeljo spytachu to husćišo, Ralbičenjo pak zahe atakěrowachu a přećiwnika k zmylkam nuzowachu. Po poł hodźinje přewzachu domjacy ceptar a docpěchu hnydom nawjedowanje. Po flance nadběhowar do wrotow zhłójčkowa. Pobočny sudnik pak pokaza na nimohru – čehodla, nichtó tak prawje njespózna. Dwě dalšej stoprocentnej składnosći Gloxyn z wuběrnymaj refleksomaj znješkódni. Krótko do połčasa pak Scholz flankowaše a z krótkeje distancy přetwori.