Nastupajo serbsku žónsku koparsku wubranku maja z ćežemi wojować

Njebjelčicy/Dešno (SN/JaW). Štwórtk, 3. oktobra, změje Serbska koparska wubranka muži swój prěni zhromadny trening ze zastupnikami delnjołužiskich Serbskich koparjow na sportowym arealu w Njebjelčicach. To připowědźi předsyda delnjoserbskich koparjow Horst Adam na naprašowanje našeho wječornika. Mjenowany dźeń zahaja koparjo z Hornjeje a Delnjeje Łužicy swoje připowědźene zhromadne přihoty na 4. koparske mišterstwa narodnych mjeńšin europeadu, kotraž wotměje so klětu wot 20. do 28. junija pola Korutanskich Słowjencow w Awstriskej.

Kaž zdźěla zarjadowar turněra, Federalistiska unija europskich narodnych mjeńšin (FUEN), je cyłkownje 24 muskich a wosom žónskich mustwow za wurisanje přizjewjenych. Za bulom honić chcedźa na hrajnišćach w cyłkownje 12 wsach a městach w gmejnje Velikovec (Völkermarkt) kaž tež w stolicy Korutanskeje Celovecu (Klagenfurt). Jedne z kopanišćow budźe samo w słowjenskim městačku Prevalje.