Dźěći sylnišo zapřijeć

štwórtk, 26. septembera 2019
artikl hódnoćić
(0 )

Serbske šulske towarstwo přewjedźe zajutřišim, sobotu, w Budyskim Serbskim domje swoju hłownu zhromadźiznu. Milenka Rječcyna je so z předsydku SŠT Ludmilu Budarjowej rozmołwjała.

Kotre ćežišćo změje lětuša rozprawa SŠT?

L. Budarjowa: Bilancujemy dźěławosć našeho předsydstwa w předchadźacym lěće. Koncentrujemy so na aktualnu situaciju w pěstowarnjach a šulach a přednjesemy tež to, štož nas trapi, kaž stej to falowacy dorost na polu kubłarjow/kubłarkow a wučerjow/wučerkow kaž tohorunja transport šulerjow.

Kotre wuskutki ma womłodźenje předsydstwa na dźěławosć towarstwa?

L. Budarjowa: Mamy wjetšu paletu temow wobdźěłać. Nazhonjenja młódšich čłonow předsydstwa nam tyja.

Z kotreje přičiny předstajiće směrodajny program SŠT? Što je jeho žro?

L. Budarjowa: Bě načasu so prašeć, hdźe stejimy we wuwiću kubłanišćow w našim nošerstwje. Za to je tajki program trěbny. Kóžda pěstowarnja ma swój koncept, na kotrymž wobstajnje dale dźěła. Wšitcy pak mamy zhromadny zaměr, dźěći nimo staršiskeho domu najlěpje na žiwjenje w šuli přihotować. Nade wšěm stejitej wuprajeni: Serbšćina je w kóždym kubłanišću w nošerstwje SŠT žiwa rěč, kotruž posrědkujemy po metodźe dospołneje imersije.

Čemu wěnujetaj so referentaj?

L. Budarjowa: Jeju tema je dimensija participacije. W srjedźišću steji dźěćo jako indiwiduum. Kak a z kotrymi srědkami móžemy wšitke dźěći zapřijeć do zabawow a sobupostajowanja w pěstowarni, je zakładne prašenje. Wone maja sobu rozsudźeć směć a wuknu swoje měnjenje zastupować. Chcemy, zo su wone sebjewědome, zo wobknježa zakładne normy zadźerženja a zo je wobkedźbuja. Participacija sylni wuwiće wažnych kompetencow dźěsća.

Kotre wočakowanja maće na wuslědki z wuradźowanjow?

L. Budarjowa: W dźěłowych skupinach chcemy předstawy přichodneje dźěławosće znosyć a dokumentować. Wažne je, zo je w pěstowarnjach a šulach potom pod fachowym nawodom zwoprawdźa. Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND