Slawijamarš na 50 kilometrach pućowacych wšěch generacijow wužadał

Hórki (SN/WŽ). Cyłkownje 278 pućowacych je sobotu rano na sportnišću w Hórkach na mjeztym štwórty Slawijamarš startowało. W třoch skupinach woteńdźechu wottam směr Delany, zo bychu po dobrych 17 kilometrach do Sulšec dóšli. Matej Wjeńka bě wobdźělnikam do starta wšě trěbne informacije sposrědkował, tak zo njesteješe wužadanju 50 kilometrow dołheho pućowanja ničo wjac na puću, chiba wosobinska konstitucija jednotliwca. Hač trenowani abo njetrenowani, młodźi abo stari – měšeńca wobdźělnikow bě pisana. „Kruh zajimcow bywa kóžde lěto wjetši“, praji Wjeńka Serbskim Nowinam. Dokelž pak su tikety za běh lětsa bjez wosobinskeho přizjewjenja předawali, sy jenož na naprašowanje wot startowacych zhonił, zwotkel pochadźeja. Z Lubuša běchu Christin Seiler, Martin Seiler a Nils Hoffmann prěni raz na Slawijamaršu přitomni. Po druhej staciji, kotraž bě po něhdźe 30 kilometrach w Serbskich Pazlicach, mějachu hišće najlěpšu naladu.