Awtor dźensa

Jan Bogusz

Lube čitarki a lubi čitarjo Serbskich Nowin, přeju Wam strowe a žohnowane nowe lěto a wjeselu so zo zdobom, zo směm lětuši rjad kolumny „Widźał, słyšał, napisał“ zahajić.

Tež lětsa wočakuje nas mnoho sportowych wjerškow w tu- a we wukraju. Hižo w februarje směmy so wjeselić na Zymske olympiske hry w Italskej, hłownje w Mailandźe a w Cortinje d’Ampezzo. W lěću budźe wjetšina do USA, Kanady a Meksika zhladować. Tam wotměje so swětowe mišterstwo w kopańcy, tutón króć z telko mustwami kaž hišće ženje, mjenujcy z 48. Němske mustwo nastupi w skupinskej fazy přećiwo koparjam z Curaçao, ze Słonowinoweho pobrjoha a z Ekwadora. Směmy tuž wćipni być, kak sej hrajerjo wokoło trenarja Juliana Nagelsmanna w běhu turněra radu dadźa.

Kajke pak swětowe mišterstwo scyła budźe, kotrež wšako zda so być wjetše hač wšitke do toho? Wjele je so hižo w předpolu wo tym diskutowało, a to pozitiwnje a negatiwnje. Po 19. juliju, hdyž wotměje so finale w East Rutherfordźe njedaloko New Yorka, budźemy wubědźowanje bilancować móc.