Choćebuz (SN/KP). Premjera aktualneje produkcije braniborskeho telewizijneho sćelaka rbb „Serbska utopija 3 - Nowaki“ je zašłu sobotu wulki zajim zbudźiła. Wulka žurla kina Weltspiegel w Choćebuzu bě nimale dospołnje wobsadźena. Režiser Erik Šyško běše runja publikumej přewšo napjaty. Wón witaše hosći a hłownych akterow na jewišću, při čimž jich do krótkich rozmołwow zapřiješe. Mjez nimi běštaj nawodnica rbb-studija Choćebuz Sandra Fritsch a redaktor delnjoserbskeho magacina „Łužyca“ Wolfgang Albus. Wón chwaleše podawk jako „historiski wokomik“, dokelž „su dźě wšitcy sobuskutkowacy pokazali, zo zamóže tež mały lud wulke kino zdokonjeć.“ Za Wiebke Šelerowu-Šulcojc jako hłownu hrajerku filma běše produkcija projekt wutroby, Erik Šyško zwurazni. Wona hraje architektku Marju Nowakojc, kotraž wodźi w lěće 2038 z pomocu wirtuelnych nawočow po wotbagrowanych wsach fiktiwneje Łužicy. Nimo toho je wona koncepciju za serbski zabawjenski park „Serbska utopija“ wuwiła, kotryž ma do přichoda wjesć.