Awtor dźensa

Kilian Hrjehor

„Kitzbühel just hits different!“, z tutej sadu je Marco Odermatt sobotu poprawom hižo wšitko prajił. Posłownje přełožene woznamjenja to telko kaž: W Kitzbühelu je prosće wšo hinak. Jendźelska sada pak wjele wjace wupraja. Wubědźowanje Hahnenkamm na legendarnej pisće Streif njeje normalny sněhakowarski wotjězd. Wone je mytos, jewišćo, hornc z hoberskim ćišćom a fabrika sonow. Štóž tam dobudźe, njedobudźe jenož wubědźowanje, ale pisa sobu sněhakowarske stawizny. Sobotu bu Marco Odermatt po wotjězdźe na Streif druhi. Wo tajkim wuslědku móže nanajwjace sněhakowarjow jenož sonić. Tola při mytowanju ronjachu so trójce dobyćerjam na dobyćerskim podesće sylzy. Maxence Muzaton bě nad třećim městnom přewšo překwapjeny, Italčan Giovanni Franzoni pak jako dobyćer njesměrnje zbožowny. Pola Marca Odermatta běchu to sylzy wulkeho přesłapjenja. A runje to pokazuje, kak Kitzbühel na sportowcow skutkuje.