Ze 180 přihladowarjemi jara derje wopytana sportowa hala w Kamjencu bě pokazała, zo je kopańca žiwa, a zo přićahuje tež w zymje tójšto fanow do ćěłozwučowarnjow. Na halowym parkeće pokaza 87 koparjow stareje koparskeje gardy jara spodobnu kopańcu. Zarjadowar ST Natwar Němske Pazlicy wjeseleše so w swojim 122. lěće po załoženju nad nahladnym wothłosom. Na 23. bulowej nocy wobdźěli so dźesać teamow Ü35 z Budyskeho wokrjesa a ze ST Seerhausen mustwo z Mišnjanskeho wokrjesa. Inkluziwnje finalnych hrow skónčichu so wot 27 partijow jenož šěsć njerozsudnje. Při wšěm třěli 36 hrajerjow 84 wrotow.