Lochkoatleća zymsku přestawku njeznaja, wšako móžeš so tež w hali we wšelakich disciplinach wubědźować. Lědma zo bě lońša lochkoatletiska wubědźowanska sezona nimo, startowachu woni w januarje znowa na wubědźowanjach.
Jedna z nich je Tereza Maćijec, bydlaca w Hrubjelčicach. Wona je so loni w juniju prěni raz na krajnym mišterstwje wobdźěliła, hdźež so wo sensaciju we wysokoskoku postara. Swój dotalny wosobinski rekord 1,31 m polěpši wo 10 cm a wudoby sej z kónčnym wuslědkom 1,41 m złotu medalju w starobnej klasy sk12 a z tym titul sakskeje mišterki. Tydźeń pozdźišo postara so Tereza na wubědźowanju w Heinza Steyerowym stadionje w Drježdźanach znowa wo wosobinski rekord we wysokoskoku. Tam přewiny 1,45 m a wudoby sej wospjet złotu medalju.
