Za prěnje wolejbulowe mustwo žonow Sportoweho towarstwa Viktorije ­Worklecy so hrajna doba 2025/2026 ­nachila. Wot cyłkownje 16 dypkowych hrow maja hižo 11 za sobu, dwě ­wotměštej so do zymskich prózdnin doma we Worklecach.

Viktoria Worklecy – TSV Kundračicy 2:3 (25:19, 22:25, 25:22, 21:25, 14:16)

Worklečanki kaž tež Kundračanki chwilu trjebachu, zo bychu rytmus hry přiwzali. Spočatnje so mjez sobu testowachu. Dypkowa taflička wjerćeše so na woběmaj stronomaj. Tola po někotrych hrajnych akcijach móžeše so domjace zastupnistwo přesadźić a snadny předskok 14:9 wutwarić. Slědowaše faza, w kotrejž Worklečanki kóždy bul ze špundowanja škrabachu, zo bychu jón wuspěšnje na dypk přetworili. TSV měješe ćeže, z nadaćemi kaž tež nadběhami wěsće wobchadźeć. Bule dźěchu pak z hrajnišća pak k wjerchej. Prěnje zastupnistwo Viktorije bu dale a wěsćiše. Sebjewědomje zamóchu sej Worklečanki z wótrymi nadaćemi a suwerenymi nadběhami konstantny předskok pjećoch dypkow wobchować. Tutón je hač do kónca sadźby přewodźeše. Worklečanki dobychu prěni přechod 25:19.