Dwanaty wubědźowanski dźeń Zymskich olympiskich hrow přinjese Němskej dalšu medalju. A zdobom wjacore sceny, w kotrychž ležachu mjez nadźiju a přesłapjenjom jenož sekundy a někotre třělwy.

Błyšćaty dypk sadźištej Laura Gimmler a Coletta Rydzek w mustwowym sprinće w sněhakowanju na dołhich čarach. Duwo docpě w swobodnym stilu bronzu a wobradźi Němskemu sněhakowarskemu zwjazkej DSV w tutej sportowej družinje prěnju medalju tutych hrow.

Nic mjenje intensiwnje, ale na kóncu bolostnje wotběža biatlonowa stafla žonow w Antholzu. Němska wobsadźi z Juliju Tannheimer, Franzisku Preuß, Janinu Hettich-Walz a Vanessu Voigt štwórte městno – za medalju pobrachowaše 21,5 sekundow. Preuß dyrbješe do chłostanskeho koła a cyłkownje trjebaše němski kwartet wosom přidatnych patronow; w boju wo podest je to přewjele. Złoto doby Francoska před Šwedskej a Norwegskej.