Třinaty wubědźowanski dźeń Olympiskich zymskich hrow měješe historisku premjeru, znowa rjane rozsudy na lodźe a wulke emocije w krasnosmykanju. Z olympiskim debitom ski mountaineeringa su prěni raz w nowej zymskej sportowej družinje medalje wudźělili.

Wo historiski wokomik postara so sprint muži w nowej disciplinje, při kotrejž zdoby sej Oriol Cardona Coll ze Španiskeje złotu medalju. Z tym krónowaše so wón k prěnjemu dobyćerjej w olympiskich stawiznach tuteje discipliny. Slěbro zawěsći sej Nikita Filippow, kiž startowaše jako neutralny atlet, a Thibault Anselmet z Francoskeje wudoby sej bronzu. Wubědźowanje wobsteješe z intensiwneho postupa ze sněhakami, krótkeho wotrězka nošenja sněhakow pěši a spěšneho wotjězda do cila. Tež žony zamóchu stawizny pisać. Marianne Fatton ze Šwicarskeje doby jako prěnja w tutej disciplinje złoto před Emily Harrop z Francoskeje a Anu Alonso Rodriguez ze Španiskeje.