ST Natwar Němske Pazlicy II – SJ Chrósćicy II 2:2 (2:2)
Za hosći hrajachu: Mark – M. Donat, Kola, Materna, Budar, Sćapan, M. Zahrodnik, Šiman, J. Donat, B. Donat, Kř. Zahrodnik, T. Donat, Klemenc, Špitank
Rezerwa Chróšćanskeje sportoweje jednotki je so zašłu njedźelu na swoju prěnju testowu do druheje połserije do Kamjenca podała. Špatneho wjedra dla njebě dotal přewjele přihota móžno. Tohodla bě dewiza přećiwo druhemu zastupnistwu z Němskich Pazlic, so najprjedy raz zaso do hry namakać.
Spočatna faza partije bě wurunana. Wobě mustwje nochcyštej so přewulkemu rizikej wustajić, tak zo so hra w prěnich mjeńšinach w srjedźnym polu wotměwaše. W 12. min. prěni króć juskachu. Po přihrawce ze srjedźneho pola wuhibny so Bosćan Donat swojim přećiwnikam, předrě so wotprawa do šěsnatki a z něhdźe sydom metrow wótrje do dołheho róžka wotzamkny. Z tym hosćo 1:0 nawjedowachu. Stajnje zaso pak zašmjatachu so mylne přihrawki w natwarje Chróšćanow, tak zo so Pazličenjo poněčim tež někotre razy přećiwnej šěsnatce přibližowachu.
