Awtor dźensa

Lukáš Novosad

Zamołwity za tule kolumnu swojich awtorow rady napomina, zo maja nimo kopańcy a wolejbula tež na druhe sportowe družiny myslić. Tohodla wužiwam dołho wočakowanu přiležnosć a pisam wo tenisu. Tole so tež hladajo na čas hodźi, wšako je serbske mjeno za měrc nalětnik, štož derje pokazuje, hdźe časowje w běhu lěta stejimy: Zyma so poněčim rozžohnuje a z njej rozžohnuje so tež zymski sport a myslimy hižo na lěćny.

Runje před měsacom je ideja šefa turněra Australian Open Craiga Tileyja kedźbnosć zbudźiła: Wot klětušeho maja žony wot štwórćfinala swoje hry na tři dobyćerske sety hrać. Pozadk jeho ideje je tajki: Finalna hra turněra žonow bě lětsa napinaca, druhe hry pak su na jasne a spěšne wašnje wotběželi. Fanojo so mjerzaja, sponsorojo runje tak. Wšako je so wopokazało, zo čim spěšniša hra je, ćim mjenje zajima ludźo za nju maja. Potajkim dźe kaž přeco wo pjenjezy, a sport steji w pozadku.