Posledni dźeń februara, minjenu sobotu, bě sej Sportowa jednotka Chrósćicy 1981 dorostowych koparjow młodźinow F a E na halowy turněr přeprosyła.

Dopołdnja w 9 hodź. bě zakop młodźiny F. Cyłkownje wosom mustwow hraješe w dwěmaj staflomaj. W předkole dopokazachu młodźi koparjo dobry hrajerski wukon. Za połfinalej kwalifikowachu so na kóncu mustwa Budissa Budyšin, BSW Łužica, Rakečenjo a domjacy cyłk Chróšćanow. Wuslědkaj połfinalow běštej jasnej, tak zo steještej sej w finalu domjace mustwo a BSW Łužica napřećo. Sćěhowaše napjata kónčna hra. BSW hižo 2:0 nawjedowaše, tola Chróšćenjo zastatk z wulkej zasadźitosću nachwatachu a hru w poslednich wokomikach na 3:2 zwjertnychu. Nalada a wjeselo nad dobyćom běštej přemóžacej. Nimo městnow a dobyćerjow bu najlěpši wrotar mytowany. To běše Stani Škoda z Pančic-Kukowa. Najlěpšej hrajerjej turněra běštaj Max Schlimper a Max Nitsche z mustwa BSW Łužica.