Zašły štwórtk wotměchu so w Drježdźanach krajne finalne koła šulerskeho wubědźowanja „Młodźina trenuje za olympiju“ we wolejbulu. Runočasnje přewjedźechu so hnydom štyri finalne wubědźowanja, mjenujcy w starobnymaj klasomaj WK II (młódši hač 18 lět) a WK III (młódši hač 16 lět) za hólcow a za holcy. W sportowym parku Ostra je za to trěbna hala a wosom hrajnišćow bě runočasnje wobsadźenych. Wulkotna to atmosfera a składnosć, so z tamnymi hrajerjemi zeznajomić.