TSV Połčnica 1920 II –

ST Marijina hwězda 2:1 (1:1)

Zestawa hosći: D. Matik – F. Peschmann, K. Pakoßnick (75. L. Hoge), Fl. Bulank, E. Zynda, A. Eldor, J. Zelnak, J. Kuring, Ch. Cyž, J. Pakoßnick, F. Kreuz (84. E. Bulank)

Druhu połseriju su koparjo Sportoweho towarstwa Marijina hwězda na kumštnym trawniku w Połčnicy zahajili. Kumštny trawnik maja w Połčnicy hakle tři a poł lěta, tuž je to wulkotne hrajnišćo. Do duela mjez TSV Połčnicu a Sokołom Ralbicy/Hórki we wokrjesnej wyšej lize bě hra přećiwo Pančanam takrjec předehra. Hosćo při rjanym słónčnym wjedrje derje startowachu. Hižo po mjenje hač šěsćdźesat sekundach měješe Florian Kreuz, po tym zo bu wot Karla Pakoßnicka pósłany, prěnju móžnosć. W krótkim róžku pak běše wrotar Jonas Lehmann z dobrej reakciju na městnje.