Serbscy konjacy sportowcy běchu wčera na wulkim turněrje w Liepe w Braniborskej. Tam wotmě so kwalifikaciski turněr za zwjazkowy championat za pjećlětne konje. Najwuspěšniši bě w přezpólnym jěchanju Křesćan Zahrodnik ze swojim walachom Valdinijom. Duwo wobsadźi prěnje městno. Worklečan Jakub Bobka zaměstni so z walachom Fiškom w samsnym pruwowanju na pjatym městnje. Franciska Bobkec a jeje kobła Mila wobsadźištej w přezpólnym jěchanju klasy A** pjate městno.

Při poražce 0:3 druheho wolejbuloweho mustwa holcow Viktorije Worklecy we Wojerecach přećiwo rezerwje Módro-běłych Wojerecy bě Josephine Buhlec najlěpša hrajerka z rjadow hosći. Prěnju sadźbu Worklečanki 26:28 přěhrachu. Dalšej přechodaj wotedachu jasnje k 16 a k 20. W sakskej klasy muži stafla wuchod su Worklečenjo sobotu w Ralbicach wobě hrě dobyli. Najprjedy 3:2 (17:25, 25:16, 18:25, 25:17, 15:7) přećiwo Kobličanam, a po tym 3:0 (25:18, 25:22, 25:20) přećiwo hosćom z Freitala. W prěnjej hrě bě Elias Kummer najlěpši hrajer partije, w druhej hrě bě to Metod Hoza.