W Praze je so zawčerawšim prestižny połmarathon wotměł, kiž je hižo wot lěta 1999 z tradiciju. Mjez 17 000 dalokoběharjemi je so lětsa tež wosom Serbow wobdźěliło, štož je dotalny rekord. Mjez nimi běštaj Marko Kliman a Beno Šołta. Z woběmaj je so Lukáš Novosad rozmołwjał.

Bě serbska skupina prěni raz tajka wulka?

Kliman: Poprawom to njewěm, ale Danko Handrik, naš organizator, je prajił, zo bě skupina prěni raz tajka wulka.

A kotry raz staj wój sobu běžałoj?

Kliman: Ja sym scyła prěni raz sobu běžał.

B. Šołta: W Praze sym prěni raz połmarathon běžał. Běch hižo loni přizjewjeny, potom pak sym schorjeł. Ale sym sej tehdy wšo wobhladał a wědźał, zo dyrbju na kóždy pad sobu běžeć.

Kajke bě za waju dožiwjenje, sej Prahu z wubědźowanskeho boka wobhladać?

Kliman: Prahu raz hinak widźeć bě to najrjeńše. Hdyž po starym měsće běžiš a so wubědźuješ, je to wosebite dožiwjenje.