Tradicionelna swjatkowna kopańca w Pěskecach měješe swój zazběh njedźelu z turněrom starobneje klasy młodźiny E. Přeprošenju sćěhowali běchu mustwa SJ Chrósćicy, ST Marijineje hwězdy, Sokoła Ralbicy/Hórki, Hlinowskeho SK, ST Bischheim-Häslich kaž tež mustwje z Njebjelčic. W 11 hodź. startowaše turněr na hrajnišćomaj po hrajnym modusu „kóždy přećiwo kóždemu“. Tak móžeše kóždy cyłk w šěsć hrach swoje sylnosće pokazać. Jako prěnje smědźachu to Njebjelčicy I přećiwo Hlinowcej a Ralbicy/Hórki přećiwo Njebjelčicam II. We woběmaj zazběhowymaj hromaj padny hnydom wjele wrotow. Prěnje mustwo SJN přesadźi so 3:1 přećiwo Hlinowcej. Tež Ralbičanscy Sokoljo docpěchu z wuspěchom 2:0 přećiwo druhemu mustwu z Njebjelčic prěnje tři dypki. Chróšćanske mustwo doby swoju prěnju hru přećiwo Bischheimej-Häslichej a pozdźišo hišće přećiwo Ralbicam/Hórkam, Njebjelčicam II a Marijinej Hwězdźe. Přidatnje docpěchu Chróšćenjo hišće remisaj přećiwo Hlinowcej a Njebjelčicam I, štož dosahaše na kóncu za prěnje městno. Mnohe hry běchu hladajo na wuslědk wuske a wurunane.