Dwacety raz pobychu šulerjo Serbskeho gymnazija Budyšin (SGB) w čěskich Janskich Láznjach, zo bychu so tam w sportowej družinje alpinske sněhakowanje wukmanili.
W stawiznach SGB započa so sněhakowarske wukubłanje w februaru 1995 w čěskej Malej Úpje blisko pólskeje hranicy. Do Kyrkonošow dojědźeštej sej tehdy rjadowni 8a a 9b z wučerjomaj Marku Pěčcynej a Rolfom Leidlerom. Minjeny tydźeń přebywaše nětko 49 šulerjow a šěsć wučerjow w Janskich Láznjach, městačku blisko Čorneje hory. Tež lětsa bě pensija „Protěž“ kwartěr Budyskich gymnaziastow.