Holcy a hólcy 9. do 11. lětnika Serbskeho gymnazija Budyšin (SGB) dobychu w Biskopicach wolejbulowe wokrjesne finale šulerskeho wurisanja „Młodźina trenuje za olympiju“, kotrež pak je nětko za wšitke dalše tři starobne skupiny koronapandemije dla wotprajene.
Srjedź nowembra započachu so w Budyskim wokrjesu šulerske wurisanja we wolejbulu pod hesłom „Młodźina trenuje za olympiju“. Ale jeničce starobna skupina II (9. do 11. lětnik) móžeše swojeho dobyćerja při wysokim saku postajić. Hižo tydźeń pozdźišo su wšitke wubědźowanja na polu sporta hač do hód wotprajili, dokelž je ličba natyknjenjow z koronawirusom razantnje přiběrała. Tak bě so systematiski přihot šulerjow Serbskeho gymnazija Budyšin na pjatkownišich AG-jach jeno za dźěl wolejbulistow wudanił.
W Biskopicach započa so turněr holcow z partiju SGB přećiwo Melanchthonowemu gymnazijej Budyšin, kotraž so z jasnym 25:9 a 25:12 skónči. Bě to njeruny duel, dokelž běchu serbske holcy technisce a atletisce wo wjele lěpše. Tež Goethowemu gymnazijej Biskopicy poradźi so wuspěch 2:0 přećiwo Melanchthonowemu.