Rio de Janeiro. Na polu sporta poskićeja přihladowarjam po cyłym swěće wot prěnjeho dnja impozantne a wusahowace wobrazy na tuchwilu w brazilskim Rio de Janeiru so wotměwacych 31. olympiskich lětnich hrach.

Prěnju złotu medalju doby třělča z powětrowku Virginia Thrasher z USA. Płuwanske wubědźowanja zahajichu so z wjacorymi swětowymi rekordami. Madźarka Katinka Hosszú zawěsći sej złoto z fenomenalnym časom 4:26:36 min. na 400m měšane stile. Dalše swětowe rekordy nastajichu Wulkobritaničan Adam Peaty na 100m hrudź kaž tež awstralska a ameriska muska stafla we wólnym stilu, Šwedowka Sarah Sjostrom na 100m delfin a Katie Ledecky z USA na 400m wólny stil.