Sport (16.05.25)
Finale znowa w Ramnowje
Lětsa přewjedu so zaso Němske dumperowe mišterstwa DDM. Hižo spočatk meje mějachu piloća prěnje wubědźowanje w Adelsdorfje. Tute bě Mike Schurig (Quersa) před Filipom Kralom (Róžant) a Paulom Domšom (Zejicy) dobył. Dalše terminy:
14.06. 14:00 Bad Freienwalde
27.07. 14:00 Hórki
31.08. 14:00 Baćoń
04.10. 14:00 Ramnow (finale)
Běh po Krakečanskich hórkach
Stajnje srjedu nawječor do Božeho spěća wotměwa so po tradiciji běhanske wurisanje po Krakečanskich hórkach. A tak budźe tomu tež srjedu, 28. meje, mjeztym hižo 37. raz. Wubědźowanje organizuje SZ Módro-běli Krakecy. Přizjewjenja su pod www.baer-service.de móžne. Planowany je kołokurs přez lěsy, łuki a zdźěla asfaltowane puće. Zapisać móžeće so na za čary 350 m, 700 m, 2,1 km, 5,1 km a 10,2 km.
Koparski derby w Radworju
Hnydom dwaj cyłkaj Sokoła Ralbicy/Hórki hrajetej dźensa wječor. Mustwo starych knjezow wočakuje zastupnistwo hrajneho zjednoćenstwa Wulke Ždźary/Ćisk a prěnje mustwo Sokoła pojědźe do Großnaundorfa. W Radworju kaž tež w Kamjencu stejitej w hrajnych planach derbyjej. Do Kamjenca pojědu Njebjelčenjo a do Radworja koparjo z Malešec.
Wolejbulisća SGB w Ralbicach wuspěšni
Třeći wólnočasny wolejbulowy turněr serije „top sydom“ je w Ralbičanskej sportowni mustwo wučerjow a šulerjow Serbskeho gymnazija Budyšin (SGB) dobyło, a to před Žołto-módrymi Kulow a druhim zastupnistwom Sokoła Ralbicy.
Po tym zo běchu Chróšćanscy wolejbulisća tydźenja w Ralbicach tradicionelny turněr „Witamy nalěćo“ dobyli, sej znowa wosom cyłkow do delanskeje sportownje dojědźe, zo bychu dobyćerja třećeho z cyłkownje sydom wólnočasnych turněrow tutoho lěta wuhrali.
Mužojo Pančičanskeho wolejbuloweho mustwa móžachu so njedawno nad ...
Lehmann hnydom štyri króć trjechił
SJ Njebjelčicy –
ST Lubuš II 6:0 (3:0)
Zestawa domjacych: Weclich D. – Hanusa, Heymann, Cyž (75. Weclich R.), Čornak (34. Plaettner), Lehmann, Hrjehor P., Rudolf (75. Herrmann), Bensch, Domš F. (34. Hahn), Domš O.
Po wuspěšnym načolnym duelu minjeny tydźeń pohosćichu Njebjelčenjo na domjacym trawniku nětko přećiwnika z Lubuša. Přećiwo druhemu mustwu sportoweho towarstwa měješe mustwo trenarja Daniela Pohlinga jasnje rólu faworita. Najebać to wzachu hosćićeljo hru jara chutnje a běchu sej toho wědomi, zo so w poslednich hrach sezony nětko žane zmylki wjace njedopušća.
Radworčenjo škit přewinyć njezamóhli
Wojerowski FC II – ST 1922 Radwor 2:0 (1:0)
Za Radworske mustwo zasadźeni: Pěčak – B. Grubert, Omran (46. Wjacławk), M. Dźisławk, Wjeńka, Paška (84. Lawka), Schöne (77. M. Grubert), Nuk (64. C. Dźisławk), Adam, Wencel, Glücklich
Po tym zo běchu Radworscy koparjo minjenej dwě hrě dobyli, mějachu tři dalše dypki k tomu přińć.
Wobě mustwje trjebaštej trochu časa, zo byštej so do partije namakałoj, při čimž Wojerowscy hru wot spočatka kontrolowachu. Hosćićeljo hrajachu jara měrnje a preciznje. Tak potom tež spěšnje dosć před wrota přińdźechu, hdźež pak hišće njestrašni wostachu. Radwor spytaše z konterami před přećiwniske wrota přińć. Najwjetšu šansu na Radworskim boku měješe Julien Glücklich, kotryž pak wrota ze zdalenosće 16 metrow misny. Wojerowčenjo přińdźechu přez dołhe bule před Radworske wrota. Tak tež po 26 hratych mjeńšinach, hdźež nadběhowar po tajkim nadběhu bul wyše wrotarja zběhny a 1:0 trjechi. Radwor steješe cyłu partiju pod wysokim ćišćom a chcyše dalšim wrotam zadźěwać. Wrotar Pěčak móžeše někotre ataki jara derje wotwobarać.
Škrička nadźije nadobo zaso swětła
FC Hansa Rostock –
FC Energija Choćebuz 1:3 (0:2)
Zestawa FC Energije: Bethke – Rorig, Kusić, Pelivan, Bretschneider (71.Putze), Borgmann, Hofmann, Ciğerci (90. Proničev), Copado, Engelhardt (83. Juckel), Thiele (90. Campulka)
wrota: 1:0 Engelhardt (8.), 2:0 Thiele (19.), 3:0 Copado (50.), 3:1 Pfanne (78.)
Po njewočakowanym wonkownym wuspěchu pola FC Hansy Rostock je so FC Energija Choćebuz zaso na třeće městno w tabulce wróćiła. Šansy na relegaciju su z tym jasnje polěpšili. Poslednju šansu za docpěće kwalifikaciskeho koła dyrbja na poslednim hrajnym dnju zajutřišim, sobotu, po móžnosći z wysokim dobyćom přećiwo Ingolstadtej wužić.
Najprjedy pak wjeselachu so w Choćebuzu přez wonkowne dobyće derbyja w Rostocku. Mustwo trenarja Wollitza překwapi w 4-4-2 formaciji. Z bojowniskej hru a z konsekwentnje agěrowacym škitom přeswědčichu. Georg Zielonkowski
Wuslědki (15.05.25)
Kopańca, wokrjesna liga, stafla I
Rakecy II – Steinigtwolmsdorf 4:1 (1:0)
Motor Kumwałd – TSV Wjazońca 3:5 (0:2)
Arnsdorf – Bretnig-Hauswalde 0:3 (0:1)
SJ Chrósćicy II – Huska/Hodźij 2:1 (1:0)
ST Porchow – ST Wjelećin 5:1 (1:1)
ST Marijina hwězda – Frankenthal 0:0 (0:0)
Hlinowc – TSV Wjernarjecy 8:1 (3:1)
1. Hlinowski SK 1931 21 80 : 15 56
2. Bretnig-Hauswalde 21 67 : 17 47
3. ST Porchow 21 56 : 31 37
4. TSV Wjazońca 20 56 : 36 36
5. Motor Kumwałd 21 48 : 50 34
6. SZ Steinigtwolmsdorf 21 43 : 40 31
7. HZ Frankenthal 21 31 : 41 30
8. Arnsdorfske KT 21 45 : 47 26
9. HZ Huska/Hodźij 21 31 : 40 24
10. ST Marijina hwězda 20 36 : 43 19
11. SJ Chrósćicy II 21 37 : 66 16
12. TSV Wjernarjecy 21 28 : 70 16
13. Rakečanske ST II 21 36 : 73 15
14. ST Wjelećin 21 43 : 68 14
3. liga
Dortmund II – VfB Stuttgart II 0:1 (0:0)
Hansa Rostock – Choćebuz 1:3 (0:2)
SC Verl – TSV Mnichow 2:2 (0:1)
Mannheim – D. Drježdźany 1:0 (0:0)
Rudne horiny Aue – Sandhausen 2:3 (0:1)
Ingolstadt – Wehen Wiesbaden 2:3 (2:1)
Unterhaching – Armin. Bielefeld 1:2 (0:1)
Chróšćenjo dwójce zastatk wurunali
SJ Chrósćicy – Póst Germania Budyšin 3:3 (1:2)
Zestawa Chróšćanow: Škoda – S. Handrik (59. Rätze), Mark, Młynk, B. Cyž, Graf, Hawš, G. Zahrodnik, M. Zahrodnik, Wornar (78. C. Handrik), Bogusz
Dźesać dnjow po pokalnej poražce witachu Chróšćenjo njedźelu znowa koparjow z města na domjacym trawniku. Wobě hrě přećiwo nim běchu serbscy koparjo w tutej sezonje jasnje přěhrali. Tohodla chcychu tónkróć lěpšu hru přećiwo Budyšanam pokazać.
Přećiwo Wjelećanam wuspěšni
SJ Wjelećin – SJ Chrósćicy II 2:4 (1:2)
Zestawa hosći: M. Mark – M. Donat, Wenderoth, T. Donat, Lehmann, Domaška, Handrik, Matik (92. J. Mark), Budar (77. Liznar), Zahrodnik (79. Wjela), Bjeńš
Start do hry so jim derje poradźi. W 5. min. so spěšnje přez srjedźne polo předrěchu a tak dósta so bul k Francej Bjeńšej. Třělwu Bjeńša drje wrotar myleše, tola kulacy so bul Chróšćan na to wěsće do prózdnych wrotow suny. Po tutych pak přewzachu najprjedy raz Wjelećenjo kontrolu nad hru a stłóčichu Chróšćanow w přichodnych 20 mjeńšinach nimale kompletnje do połojcy přećiwnika. W tutej fazy sej wjacore dobre móžnosće wuhrachu, tola wrota zwjetša misnychu. Tak sadźi nadběhowar wótru přihrawku na žerdź wrotow (17.). W 19. min. pak so domjacym wurunanje poradźi.Hrajerjej na křidle so kožana kula před noze suny a wón ju z dźesać metrow preciznje do krótkeho róžka smokny. W 42. min. třěli Clemens Handrik wólny kop z něhdźe 25 metrow na dołhu žerdź. Wrotar drje za bulom skoči, tola so zamyli, tak zo trjechi kula we wysokim róžku do saka.
Wolejbulisća z dobrym wukonom sezonu skónčili
Na poslednim hrajnym dnju sezony w sakskej klasy dźěše za Worklečanskich wolejbulistow poprawom jenož hišće wo tak mjenowanu „złotu ananas“. Šeste městno w tabulce a z tym zdźerženje klasy běštej jim wěstej. Za jich přećiwnikow pak bě nadawk bytostnje wažniši. SC Freital chcyše swoje bronzowe městno w tabulce zakitować a VV Žitawa poslednju šansu přećiwo zestupej wužić. To lubješe mnohim fanam napjatosć.
Viktoria Worklecy – VV Žitawa 3:1 (25:19, 21:25, 25:15, 30:28)
