Tydźenja dojědźechu sej štyrjo hrajerjo Budyskeje FSG a třo volleyballisća sportoweho towarstwa Marijina hwězda do Ehrenfriedersdorfa južnje Kamjenicy, zo bychu jako kombinowany cyłk wo titul Sakskeho mištra seniorow w starobnej klasy nad 53 lětami wojowali. Před lětomaj zešlachći so předewzaće Budyskim volleyballistam, jako w swójskej hali Motor Thurm a BSV Ehrenfriedersdorf po­razychu (SN wo tym rozprawjachu). Wobě mustwje běštej znowa pódla kaž tež seniorojo VZ Schönbacha. W turněrowej formje hraješe kóždy přećiwo kóždemu dwě dobyćerskej sadźbje. Wot dohromady šěsć partijow skónčichu so tři w rozsudnym třećim přechodźe. Mustwo Budyskich a Pančičanskich volleyballistow startowaše optimalnje a přesadźi so přećiwo Thurmskim hrajerjam w prěnjej sadźbje z 25:17. Kombinowany cyłk so spěšnje na so nastaji a taktisce derje harmonowaše. Tola w druhim přechodźe inwestowaše sportowy kontrahent wjace mocow do pólneho škita a wotwobara tak lěpje smeše hrajerjow z Łužicy. Wón rozsudźi sadźbu z 25:19 a přewza eufo­riju do poslednjeho wotrězka partije.