Viktoria Worklecy w top 16 Sakskeje

póndźela, 08. meje 2017
artikl hódnoćić
(0 )
Dorostowy toptalent w rjadach Viktorije Worklecy je Benjamin Grutka ze Sernjan.  Foto: Marcel Rjelka Dorostowy toptalent w rjadach Viktorije Worklecy je Benjamin Grutka ze Sernjan. Foto: Marcel Rjelka

Benjamin Grutka ze sportoweho towarstwa Viktoria Worklecy wobdźěli so srjedź měrca w Döbelnje na tak mjenowanym dypkowym hódnoćenskim turněrje, na kotrymž startowaše 16 najlěpšich blidotenistow starobneje klasy U11 Sakskeje. Po dźewjeć napjatych a napinacych hrach wobsadźi młody Sernjančan wulkotne 11. městno a je najsylniši hrajer swojeje starobneje klasy w sewjerowuchodnej Sakskej. Kedźbyhódny talent pokaza wón hižo w minjenej hrajnej dobje, jako zamó so samo přećiwo jasnje staršim přećiwnikam přesadźić. Za Viktoriju Worklecy je tónle wuspěch zasłužba intensiwneho dorostoweho dźěła. Wokomiknje nastupi towarstwo ze šěsć hrajerjemi w dorostowej klasy; jich načolny hrajer je, njehladajo na swoju młodosć, Benjamin Grutka.

Kónc zašłeje sezony su štyrjo młodostni wot dorosta k mužam Viktorije přešli a žnějachu hižo tón abo tamny naspomnjenjahódny wuspěch. Nimo toho trenuje tučasnje hišće dźesać dalšich dźěći z celuloidowym bulikom, zo bychu so prjedy abo pozdźišo tež z druhimi w dypkowych hrach měrić móhli.

wozjewjene w: Sport
Prošu přizjewće so, chceće-li komentar podać

Serbska debata

nowostki LND