26. awgusta 1977 přeskoči Rosemarie Wićazec-Ackermannowa z Choćebuza, rodźena we Łazu, jako prěnja žona swěta dwaj metraj w Berlinskim olympiskim stadionje ze staddlowym skokom (Wälzsprung). Łužičanka běše tehdy jedna z najpopularnišich lochkoatletow swěta. Nimale 40 lět po swojim wulkim wuspěchu je bywša sportowča 4. apryla 65ćiny woswjećiła.
Jako šulerka na Łazowskej šule je so Rosemarie Wićazec tež na wučbje serbšćiny wobdźěliła. Kak pak bu wona tajka wuspěšna wysokoskakarka? Jeje něhdyši trenar Ehrhard Miek k tomu praješe, zo bě jemu 1966 na spartakiadźe we Wojerecach jeje eksploziwny wotskok při wysokoskoku napadnył, štož jeho předstawam wotpowědowaše. Tak přiwza ju do sportoweho kluba w Choćebuzu, hdźež zamó ju na zakładźe talenta a wulkeje pilnosće k wysokoskakarce wukubłać.
