Hórku poražku poćerpje prěnje blidotenisowe mustwo DJK Konjecy pola TTC Wojerec III. Byrnjež z Michałom Elstnerom a Dierkom Šewcom stajnaj hrajerjej wupadnyłoj, njeje poražka 3:12 žane zamołwjenje, dokelž docpěštaj Julian Hrjehor (1) z třećeho mustwa a André Čórlich (1) jako jeničkaj normalnu formu.Tamny dypk doby dwójka Maćij Kokla/Alojs Čóška. Wosebje Kokla, Čóška a Pětr Bejma njezawěsćichu sej w hrach jednotliwcow ani dypka a na cyłej liniji přesłapichu.
Konječanske druhe mustwo pohosći za swójskimi blidami ST Halštrow a doby jasnje z 10:5. Mustwo njeměješe w swojich rjadach žadyn wupad. Dietmar Hrjehor, Křesćan Gruhn, Rudolf Wittig a Frank Woko dobychu kóždy połdra dypka. Wo wulke překwapjenje postara so za Rainera Roßmyja hrajacy Daniel Zukunft z třećeho mustwa, na kotrehož konće steješe 2,5 dypkow.
Konječanske třeće mustwo podleža pola SV Ullersdorfa II snadnje ze 6:9. Najlěpši Konječan bě dorostowy hrajer Julian Hrjehor (2,5). Tež Olaf Thiela (1,5) a Jan Bjeńš (1) dypkowaštaj. Rafałej Šěrakej (0,5), Frankej Šołće (0,5) a Norbertej Gallej (0) njeje so přewjele zešlachćiło.
