ST Radwor – LSV Hory 0:3 (0:1)
Zestawa domjacych: Wróbl – Omran (61. Wjeńka), Šěrak, Henke, Zähr, Mark (40. Winar), Zimmermann, Rachel (83. Bauer), Bejmak, Kurjat, Schulze
Njedźelu witachu Radworscy koparjo w nachwatanskej hrě tabulkoweho susoda z Horow. W prěnjej połseriji móžachu sej Radworscy na Horach hišće dypk wuwojować. Wot toho pak běchu njedźelu daloko zdaleni. Trenar Pětr Bejmak bě swojich hrajerjow do hry před dobrej ofensiwu přećiwnika warnował. Wot spočatka sem přewzachu hosćo komando na hrajnišću a so tak přeco strašnje wrotam bližachu. Prěnje wjetše šansy hišće wuwostajichu, tola domjacy njenamakachu srědki přećiwo spěšnym kombinacijam. Po 20. min. klinkaše prěni raz w klětce Fabiana Wróbla. Koparjo z Horow přihrawachu sej bul w srjedźnym polu bjez wobaranja Radworskich. Marius Nikol přewza zamołwitosć a sadźi bul z 20 metrow do saka. Tež po nawjedowanju hosći njemóžachu sej Radworscy šansy wuhrać. W srjedźnym polu falowaše trěbna klasa w dwubojach a tak běchu nimale přeco domjacy škitarjo prašeni.
