Titul wicemištra sej wubědźili

wutora, 05. junija 2018
artikl hódnoćić
(0 )
Worklečanscy koparscy přećeljo wobdźělichu so jara wuspěšnje na 14. fanowych mišterstwach FC Energije Choćebuz.  Foto: Dawid Matik Worklečanscy koparscy přećeljo wobdźělichu so jara wuspěšnje na 14. fanowych mišterstwach FC Energije Choćebuz. Foto: Dawid Matik

Pjeć dobyćow, jedyn remis a jenička poražka postarachu so wo wulkotne druhe městno Worklečanskich koparskich přećelow na 14. fanowych mišterstwach FC Energije Choćebuz. Přećiwo Choćebuskim kickeram 2016 su woni 3:0 dobyli. Wrota docpěchu Dawid Matik, Tomaš Čornak a Tobias Hejduška. Wrota Tomaša Cuški a Richarda Kmjeća přećiwo teamej VKL Soccer Choćebuz zawěsćichu jim dalše tři dypki po dobyću 2:1. Jeničce pozdźišemu dobyćerjej wubědźowanja Collettivo Bianco Rosso serbscy hrajerjo z 0:2 podležachu. A to bě jich jenička poražka w běhu turněra.

Dalši wuspěch 1:0 wokoło najlěpšeho třělca dnja Tomaša Cuški zaručichu sej čornokošlacy přez wrota Cuški přećiwo kolektiwej Frontside. Samsny wuslědk docpěchu přećiwo Južnobraniborskim kadlam (Čornak). Z dobyćom 2:1 skónči so šeste zetkanje. Za chowancow Handrija Bjedricha trjechištaj Matik a Hejduška. K zakónčenju hrajachu 1:1 přećiwo Fanowemu klubej Delnja Łužica (Kmjeć).

wozjewjene w: Sport
Prošu přizjewće so, chceće-li komentar podać

Serbska debata

nowostki LND