SJ Njebjelčicy
– HZ Hórnikečanski jězor 2:0 (0:0)
Zestawa domjacych: Hahn – Kral, Gödig, Haška, Wagner (64. Čornak), Hanuza, Šołta, Plaettner, Korjeńk (90. Matješk), Pawlik, Ričel (64. Lejnart)
W prěnjej dypkowej hrě po zymskej přestawce poradźi so chowancam koparskeho trenarja Handrija Krawčika při najlěpšim wjedrje hnydom jasne dobyće. Wšitcy aktiwni běchu po treningowych jednotkach a třoch přihotowanskich partijach w dobrym ćělnym stawje. Hižo we 8. min. wotwobara wrotar Nico Hahn po strašnym konteru hosći z prima refleksom wótru třělwu. Po spěšnym nadběhu z Njebjelčanskeho srjedźneho pola třěli pak Dennis Wagner bul snadnje nimo (17.). Na to zjewi so přećiwniski nadběhowar cyle samlutki před Hahnom, tón swój nadawk na wrotowej liniji stejo znowa zmištrowa (18.). W dalšim wotběhu wosta partija wurunana, doniž Franc Gödig, na prawej stronje derje zasadźeny, kulowatu kožu wótrje před klětku hosći njesadźi. Třělwu přiwza Wagner, ale znowa do wrotow njetrjechi (43.).
