Sakske jěchanske mišterstwaw Hórkach wuhotowali

wutora, 15. septembera 2020
artikl hódnoćić
(0 )
Młodźi jěcharjo towarstwa Při Klóšterskej wodźe, kotřiž su w Hórkach w pruwowanju klasy E nastupili: Franciska Bobkec, Marija Bobkec, Mayte Hetmankec a Marlene Matikec (wotlěwa)  Foto: Jakub Bobka Młodźi jěcharjo towarstwa Při Klóšterskej wodźe, kotřiž su w Hórkach w pruwowanju klasy E nastupili: Franciska Bobkec, Marija Bobkec, Mayte Hetmankec a Marlene Matikec (wotlěwa) Foto: Jakub Bobka

Prěni septemberski kónc tydźenja su w Hórkach jěchanski turněr přewjesć směli. Wosebje mnohostronskich jěcharjow wón jara wabješe. Wšako maja tam přeco rjane přezpólne kursy. Miłočan Pětr Bobka je naćisnje a z pomocnikami z jěchanskeho towarstwa natwarja. Tež w lěće koronawirusa prócowaše so jěchanske towarstwo Při Klóšterskej wodźe Pančicy-Kukow wo organizaciju jěchanskeho tuněra, štož je so skónčnje wudaniło.

Wuhotowali su sakske mišterstwa młodych jěcharjow starobneje klasy U21 a juniorow starobneje klasy U18. Mišterstwa za młodych jěcharjow wobstejachu z mnohostronskeho pruwowanja klasy L. Juniorojo měrjachu so w pruwowanju klasy A z dwěmaj hwězdźičkomaj. Woboje mišterstwa wotměchu sobotu. Pola młodych jěcharjow nastupištaj z Hilku Hetmankec a Jakubom Bobku tež sportowcaj z domjaceho towarstwa. Wobaj móžeštaj so derje prezentować a ze swojimaj konjomaj dobre wuslědki docpěć. Hilke docpě na krajnej runinje třeće a Jakub štwórte městno. W mnohostronskim pruwowanju klasy L móžachu so tež dorosćeni jěcharjo wobdźělić. Jich wuslědki pak njemějachu žane wuskutki na mišterstwa U21. Chróšćan Křesćan Zahrodnik, kiž so w Hórkach wobdźěli, móžeše runje mjenowane pruwowanje za sebje rozsudźić a zawěsći sej tak złotu seklu.

Mišterstwa juniorow wotměchu so w pruwowanju klasy A z dwěmaj hwězdźičkomaj. Tu startowaštej Franciska a Felicitas Bobkec z Miłoćic. Wobě stej přezpólny kurs derje zmištrowałoj. Dokelž bě konkurenca chětro sylna, njeje pak za prědnje městna dosahało. Pětr Bobka předstaji na turněrje chětro młodeho a hišće njenazhoniteho konja. Wobaj pak wšitke nadawki zmištrowaštaj.

Njedźelu přewjedźechu na Hórčanskim sportnišću hišće pruwowanja za młode konje kaž tež mnohostronske pruwowanje klasy E. Křesćan Zahrodnik a Jakub Bobka staj wobaj hišće dwaj młodej konjej předstajiłoj. W pruwowanju klasy E su hnydom štyrjo dorostowi jěcharjo domjaceho towarstwa startowali. Młodźi sportowcy móžachu so tak zdobom před domjacej kulisu wubědźować. Tohorunja njedźelu wotměchu so hišće někotre skakanske wubědźowanja hač do klasy M, a wone přiwabichu mnohich přihladowarjow.

Wšitke jěcharki a wšitcy jěcharjo dźakuja so sobustawam towarstwa, kotřiž su pomhali zaso tajki krasny turněr na nohi stajić. Jakub Bobka

Wuslědki w přehledźe:

Mnohostronske pruwowanje klasy A**

8. městno: Franciska Bobkec/Cilka

11. městno: Felicitas Bobkec/Leonardo

24. městno: Pětr Bobka/Čorna

Mnohostronske pruwowanje klasy L

1. městno: Křesćan Zahrodnik/Namibia

8. městno: Hilke Hetmankec/Dakota

  (3. městno mišterstwa U21)

9. městno: Jakub Bobka/Conan

(4. městno mišterstwa U21)

Mnohostronske pruwowanje klasy E

3. městno: Mayte Hetmankec/Bell-a-Bon

6. městno: Franciska Bobkec/Hallo Horka

8. městno: Marija Bobkec/Carlos

16. městno: Marlene Matikec/Baka

Mnohostronske pruwowanje klasy A** za młode konje

3. městno: Křesćan Zahrodnik/Veritas

8. městno: Jakub Bobka/Lillyfee F

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND