Spočatk měrca 2020 běše koparski swět hišće w porjadku. Tak tež stari knježa Sokoła Ralbicy/Hórki z toho wuchadźachu, zo so jich winowatostne hry 14. měrca z pokalnej hru zahaja. Zo bychu prawje přihotowani byli, zetkachu so tydźeń do toho na kumštnym trawniku w Hnašecach z tamnišim mustwom, kotrež dotal hišće ženje přećiwo Sokołej nastupiło njebě. Delanscy koparjo hru tehdy 8:1 za sebje rozsudźichu.
Po tym pak přińdźe prěni lockdown a z nim wulka njewěstosć. 13. meje Zapadołužiski koparski zwjazk rozsudźi, sezonu kaž tež pokalne koło njepřewjesć. Kajka to zrudźaca powěsć. Traješe hač do kónca meje, prjedy hač Sokoljo znajmjeńša zaso trenować započachu. W zdźělence koparskeho zwjazka z 11. junija běše pod wěstymi hygienowymi naprawami zaso dowolene přećelske hry přewjesć. Tola přećiwo komu? Wólnočasne mustwa mějachu swoje hrajne terminy dawno zaplanowane. Organizować partije přećiwo znatym cyłkam z ligi so tohorunja jako jara ćežke wopokaza.